«Yaşa, benim Halkım!

Yaşa, Gagauz Yerim!

Yaşasın Gagauziyada kardaşlık hem dostluk!

Aramızda olsun sevda hem uygunnuk!»

Büün, kıran ayın 23-dä, tamannandı 27 yıl, nicä Moldova Respublikası Parlamenti kabletti “Gagauziya (Gagauz Yeri) ayırı yuridik statusu için” Zakonu da kuruldu Gagauziya avtonomiyası.

Saygılı yaşayannar! Gagauz Yeri Genel üüretmäk müdürlüü kutlêêr hepsini bu önemni dataylan - Gagauziyanın 27-ci yıldönümünnän.

Katılarak büünkü büük yortuya, isteeriz dilemää Gagauziyaya kaavi inan, girginnik, ariflik, saygı dilinä hem adetlerinä. Gagauziyanın vatandaşlarına hem bütün dünnedä yaşayan gagauzlara da saalık, annaşmak hem birlik!

Bu yortuya karşı Gagauziyanın okullarında geçti regional konkursu - uroktan dışarı açık meropriyatiyalar, adanılmış 27-ci yıldönümünä nicä kuruldu Gagauz Avtonomiyası.

Meropriyatiyalar zenginnetilär üürenicilerin sözünü, dilini, bilgilerini gagauz halkı için; istoriya sayfalarını aaraştırarak, terbiettilär uşaklarda sevgi gagauz dilimizä, kulturamıza, istoriyamıza, adetlerimizä. Üürenicilär hatır hem sevgi gösterdilär bizim Vatanımıza, Bucaamıza. Nicä dä bizim üürenicilerdä, isteeriz herkezin üreendä herzaman olsun gözäl duygular: saygı, sevgi hem hodulluk Ana tarafımıza.

Bütün ürektän kutlêêrız hepsi Gagauziyanın yaşayannarını bu gözäl yortuylan!

Adêêrız hepsinä saalık, kısmet hem bereket!