Gagauz Yeri Genel Üüretmäk Müdürlüü bu yortuya kaarşı üürenicilerin hem üüredicilerin yardımınnan hazırladı hem geçirdi bir sıra meraklı olay: açık urokları, onlain kursları hem akţıyaları. Nicä dä her yıl, hepsi isteyennerä verildi kolaylık denemää kendi bilgilerini da pay almaa Gagauz dilindä Genel Diktantın yazmasında.

Bu gün, hederlez ayın 17-dä, esaplandı «Ana Dilimizä» baaşlı bir ayın sonuçları. Pay alannarı gösterdilär en ii, en başarılı çalışmalarını, annattılar şiirleri hem sözleri, gösterdilär urokların fragmentlerini bizim sevgili ana dilimizdä.

Selemnemäk sözündä «Ana Dilimiz» yortunun pay alannarını, Gagauz Yeri Genel Üüretmäk Müdürlüün başı Nataliya KRİSTEVA açıkladı, ani hepsi bu meropriyatiyaları geçireräk, bakannık koydu neetä barabar üürenicilärlän hem üüredicilärlän korumaa, desteklemää, ilerletmää, kaldırmaa gagauz dilini hem onun rolünu, nicä bir gagauz halkın ruh hem kultura mırası.

«Siz, uşaklar, geçän ayda gösterdiniz kendinizi çok aktiv: annattınız bizim zengin hem şıralı gagauz dilimizdä peet hem siir, çaldınız türkü, oynadınız gagauz danslarını hem hazırladınız meraklı prezentațiları Ay-Boba Mihail Çakir için.

Bu ayın içindä siz gösterdiniz becermeklerinizi gözäl lafetmää ana dilimizdä, ezber duygulu okumaa gagauz yaratmalarını, angıları açıklȇȇr sevgi ana tarafımıza, ana dilimizä», - danıştı üürenicilerä Natalya Kristeva.

Gagauz millet yortusuna «Ana Dilimiz» bütün Avtonomiya bölgesindä Gagauz Eri geçti onlayn – akţiya «Genel Diktant Gagauz dilindä». Akţiyada pay aldılar Gagauziyanın hepsi yaşayannarı 13-19 yaşında hem yaşayannar 20-dän zeedä yaşta. Hepsi - 461 pay alanı.

«Ana Dilimiz» final meropriyatiyasında belli edildi Genel Diktantın enseycileri dä.

Hepsi pay alannarı büünkü meropriyatiyada kazandılar diplom hem baaşış.