Meropriyatiyalar geçtilär neetlän zenginnetmää üürenicilerin sözünü, dilini, bilgilerini gagauz halkı için; istoriya sayfalarını aaraştırarak, terbietmää uşaklarda sevgi gagauz dilimizä, kulturamıza, istoriyamıza, adetlerimizä; terbietmää üürenicilerdä hatır hem sevgi bizim Vatanımıza, Bucaamıza.
Üürenicilär türkülerin, şiirlerin, insţenirovkaların yardımınnan annattılar, ani:
- Gagauziyada yaşayan insannar istedilär serbest olsunnar, başka halklarlan bir uurda bulunsunnar, kendi yaşamasına, ecelinä saabi olsunnar;
- İstedilär kendi kulturasını ilerletsinnär, adetlerini, dilini korusunnar. Moldova halkın hem gagauz halkın aralarında dostluk hem annaşmak olsun.
Ușaklar geniştän gösterdilär gagauzların harakterini Ay-Boba Mihail Çakirin aaraştırmaklarına görä. Adetlerä görä düzdülär gagauz odaları: büük ev, imek odası, yatmak odası; kurdular sofraları. Meropriyatiyalarda oldu baalantı muzey eksponatlarınnan.
Üürenicilär, kullanıp anılmış gagauz yazıcıların annatmalarını, dramaturgiya kolaylıınnan gösterdilär sțenaları: Komrat kalkıntısını (1906 yıl), l-ci gagauz syezdını (1989 yıl), Gagauz Dünnää kongresini (2006), eski (horu) hem eni (festival "Gagauz kilimneri") adetleri.
Yarışmanın pay alannarı becerikli teatru kıpımı gösterdilär, çaldılar gözäl türkülär Ana Taraf için. Demekli hem duygulu sölendi şiirlär Bucak için. Zenginnetti yortuları Gagauz sţenkalar, neredä artistlär gösterdilär şıralı ana dilin zebilliini. Kullanıldı interaktiv tehnologiyalar.
Valkaneş gimnaziyasında S. Rudenko adına klastan dışarı meropriyatiya geçti intelektual oyunu gibi ”BREYN–RİNG”, angısında pay aldı iki komanda «Dostluk» hem «Usluluk».
Kongaz gimnaziyasında N. Ҫebanovun adına meropriyatiya geçti pirdänka gibi, angısında, sarmısak beklärkana Ay Andreyä karşı, açıklandı Gagauz Erin kurulması hem gagauz halk adetleri.
«Biz var nasıl Gagauziyamız için raat olalım, çünkü burada sevmää, sevinmää hem düş gütmää becerän uşaklar büüyer - evlat boyları - Gagauziyanın gelecää!», - bu laflarlan yortu geldi kendi sonuna Çeşmäküüyün teoretik liţeyindä.
Bu yarışmakta käämil öttü uşakların sözü, açıklandı üürenicilerin artistik becermekleri. Herkezin üreendä kaldı gözäl duygular: saygı, sevgi hem hodulluk ana tarafımıza.
